प्रत्येकाच्या मनात वेगवेगळा पाऊस
कुणाला हसवणारा कुणाला रडवणारा
कुणाला नकोसा कुणाला हवासा
छत्रीच्या आठवणींचा रेनकोटच्या एकटेपणाचा
कुणाचा बेभान चिंब तसेच निथळण्याचा पाऊस
पाऊस कौलारू घरामधला
पाऊस पत्र्यावर तडतड वाजणारा
पाऊस भिंतीवरून तसाच खाली ओघळणारा
पाऊस पागोळ्यांचा
पाऊस आसऱ्याशिवाय जाब विचारणारा
पाऊस रानवनातला पाऊस दऱ्याखोऱ्यातला
पाऊस कच्च्या रस्त्यावर चिखल करणारा
पाऊस डांबरी रस्ते अन काँक्रीटचे जंगल
धुवून काढत कधी त्यांना न जुमानणारा
पाऊस मनाला खुलवणारा
पाऊस सगळं बदलणारा
आर्त गाणी आठवणारा
हुरहुरती गाणी गुणगुणणारा
पाऊस अनावर उत्सुक
ओठांची अनामिक थरथर
पाऊस कधी उदास
डोळ्यातून बरसणारा
पाऊस कधी लपवलेला
हलकेच स्वरांत डोकावलेला
पण तरीही कसाही बरसला
तरी सच्चा आत एक अन बाहेर एक नसलेला ......
हरीश
No comments:
Post a Comment