एखादा वेडा पाऊस डोळ्यांची कड भिजवून जातो 

तेव्हा समजावे की ती तुमच्या निकट आहे 

पावसाचा स्पर्श म्हणजे तिचाच स्पर्श 

ओल्या मातीचा गंध म्हणजे तिच्या भावनांचा अर्थ 

अन टपटपणारे पाणी म्हणजे तिचे अनवट शब्द     

इंद्रधनुचे रंग दिसले की मनाचा ऋतू बदलावा  

सप्तरंगात उत्कट आठवणींचा झरा वहावा 

जरा हसून पाहिलं तर कदाचित तीही दिसेल 

सूर्यकिरण चेहेऱ्यावर घेऊन ती कोवळ हसत असेल 

हिरव्यागार पाऊलवाटेवर जेव्हा आपण चालत असू 

ढगांमध्ये चमकणारी वीज आपण पहात असू 

अवेळी चिवचिवणारी पाखरे बघून चिंता करत असू 

अन अलगद हात हातात गुंफून डोळ्यांमध्ये पहात असू 

आता जरी ती नाही तरी तिच्या आठवणी आहेत 

मनामध्ये बरसणाऱ्या चिंब काही साठवणी आहेत 

वाटेवरचे गर्द झाड अजूनही हिरवे आहे 

अन मनामध्ये एक सतार कधीचीच वाजते आहे  

हरीश